തിരുവനന്തപുരം: സംസ്ഥാനത്തിന്റെ പ്രധാന വരുമാന മാർ​ഗം ലോട്ടറിയാണെന്ന പ്രചാരണം തെറ്റാണെന്ന് ധനമന്ത്രി കെഎൻ ബാല​ഗോപാൽ. തന്റെ ഫേസ്ബുക്ക് പേജിലൂടെ അദ്ദേഹം ലോട്ടറി വരുമാനത്തെ സംബന്ധിച്ച് കണക്കുനിരത്തുന്ന വീഡിയോ പുറത്തുവിട്ടു. ലോട്ടറിയിൽ നിന്ന് ഒരു വർഷം വെറും 1022 കോടി രൂപ മാത്രമാണ് ലാഭമെന്ന് അദ്ദേഹം പറഞ്ഞു. 2024-25 സാമ്പത്തിക വർഷത്തിൽ ലോട്ടറിയിൽ നിന്ന് ആകെ വരുമാനം 13244 കോടി രൂപയാണെങ്കിലും മൊത്തം ചെലവ് 12222 കോടി രൂപയാണെന്നും വീഡിയോയിൽ പറയുന്നു. ലാഭം വെറും 1022 കോടി രൂപയാണെന്നും പറയുന്നു. മൊത്തം തനതുവരുമാനത്തിന്റെ വെറും ഒരുശതമാനം മാത്രമാണ് ലോട്ടറിയിൽ നിന്ന് ലഭിച്ചത്. മൊത്തം വരുമാനത്തിന്റെ അരശതമാനം പോലും ലോട്ടറിയിൽ നിന്ന് ലഭിക്കുന്ന വരുമാനം വരില്ലെന്നും വീഡിയോയിൽ പറഞ്ഞു.